Обре́тение честны́х моще́й святы́я преподо́бныя благове́рныя вели́кия княги́ни и́нокини А́нны, Ка́шинския чудотво́рицы
(Слу́жбу ея́ зри 12 ию́ня, на пренесе́ние честны́х моще́й)
Тропа́рь, глас 3:
Днесь восхваля́ем тя, препрдо́бная ма́ти,/ вели́кая княги́не и́нокине А́нно:/ я́ко бо лоза́ плодови́та посреде́ те́рния,/ процвела́ еси́ во гра́де Ка́шине твои́ми доброде́тельми,/ всех удиви́ла еси́ чу́дным твои́м житие́м,/ те́мже Христу́ Бо́гу угоди́ла еси́,/ и ны́не, ра́дующися и веселя́щися,/ пребыва́еши с ли́ки преподо́бных жен,/ наслажда́ющися ра́йския красоты́ и весе́лия./ Мо́лим у́бо тя:/ моли́ о нас Человеколю́бца Христа́, Бо́га на́шего,/ дарова́ти нам мир и ве́лию ми́лость.
Ин тропа́рь, глас 4:
Просвети́вшися Боже́ственною благода́тию, преподо́бная,/ и пра́востию у́мною ду́шу твою́ привяза́вши в любо́вь Христо́ву,/ тле́нная, и кра́сная, и вре́менная ни во что́же вмени́ла еси́./ Кре́стным зна́мением на мы́сленныя враги́ му́жески вооружи́вшися,/ по́стническими по́двиги, посто́м и моли́твами/ у́глие страсте́й угаси́ла еси́, достосла́вная А́нно,/ и по сме́рти источа́еши благода́ть притека́ющим к моще́м твои́м./ И ны́не, в Небе́снем черто́зе с му́дрыми де́вами предстоя́щи Христу́,/ моли́ о нас, почита́ющих святу́ю па́мять твою́.
Сла́ва, и ны́не, Богоро́дичен:Е́же от ве́ка утае́нное:
Кано́н преподо́бней на обре́тение честны́х ея́ моще́й, глас 5.
Песнь 1
Ирмо́с:
Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,/ Тому́ Еди́ному пои́м, я́ко просла́вися.
Припе́в: Преподо́бная ма́ти, благове́рная княги́не Анно,/ моли́ Бо́га о нас.
А́гнче Бо́жий, Сло́ве,/ даждь ми сло́во, недосто́йному рабу́ Твоему́,/ да возмогу́ воспе́ти торжество́ в па́мять обре́тения моще́й преподо́бныя благове́рныя княги́ни Анны, взыва́я:/ Тому́ Еди́ному пои́м, я́ко просла́вися.
Безве́стная и та́йная, после́днему ро́ду явле́ны бы́ша честны́я мо́щи твоя́, блаже́нная А́нно,/ к ни́мже прикаса́ющеся, освяще́ние прие́млем, Го́сподеви пою́ще:/ Тому́ Еди́ному пои́м, я́ко просла́вися.
Всесвята́я твоя́ па́мять возсия́ ми́рови, я́ко со́лнце,/ просвеща́ет ду́ши благоче́стно пою́щих тя,/ в не́йже моли́ся, преподо́бная А́нно, пода́ти очище́ние грехо́в Го́сподеви зову́щим:/ Тому́ Еди́ному пои́м, я́ко просла́вися.
Богоро́дичен: Господороди́тельнице Чи́стая, Небе́сный вхо́де, горо́ несеко́мая, дверь непроходи́мая,/ апо́столом сла́во, му́чеником весе́лие, преподо́бным красото́,/ приими́ моле́ние на́ше, е́же Ти прино́сим в па́мять Богому́дрыя А́нны, Го́сподеви пою́ще:/ Тому́ Еди́ному пои́м, я́ко просла́вися.
Песнь 3
Ирмо́с:
Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жущем, Христе́, ка́мени
за́поведей Твои́х,/ Це́рковь Твою́ утверди́, Еди́не Бла́же и Человеколю́бче.
Днесь пра́зднственный день пра́зднуют наро́ди гра́да Ка́шина,/ обрето́ша бо мо́щи преподо́бныя вели́кия княги́ни А́нны це́лы и нетле́нны,/ я́ко не́кое сокро́вище бога́тно, непреста́нно Христу́ зову́ще:/ Це́рковь Твою́ утверди́, Еди́не Бла́же и Человеколю́бче.
Еди́ну добро́ту Христо́ву Боже́ственну возлюби́вши/ и Того́ распа́льшися невеще́ственными красота́ми,/ добро́ты теле́сныя не щади́ла еси́, сла́вная,/ виде́нии Боже́ственными пребыва́ющи и непреста́нно Христу́ зову́щи:/ Це́рковь Твою́ утверди́, Еди́не Бла́же и Человеколю́бче.
Житие́ твое́, я́ко со́лнце, в сердца́ ве́рных возсия́, зари́ чуде́с испуща́юще./ Те́мже и нас невече́рним све́том озари́, всечестно́е твое́ обре́тение почита́ющих,/ да непреста́нно Христу́ зове́м:/ Це́рковь Твою́ утверди́, Еди́не Бла́же и Человеколю́бче.
Богоро́дичен: Зело́ лю́те погружа́емую ду́шу мою́ в пучи́не жите́йских страсте́й/ и бу́рею одержи́мую безме́рных согреше́ний изведи́ из глубины́ зол мои́х,/ спасе́ния ми простри́ ру́ку, Пречи́стая.
Седа́лен, глас 5:
Пресве́тлая и светоно́сная приспе́ твоя́ па́мять, преподо́бная ма́ти, Богому́драя А́нно,/ созыва́ющи ве́рных мно́жество просла́вити и пе́ти твое́ честно́е обре́тение./ Проси́ нам от Христа́ прия́ти ве́лию ми́лость.
Сла́ва, и ны́не, Богоро́дичен:
Яви́лася еси́ вы́шши Небе́сных сил,/ Влады́ку и Христа́ ро́ждши, Богоро́дице,/ земны́х естество́ возвела́ еси́, Богоневе́стная./ Те́мже Тя вои́стинну, Богороди́тельнице, се́рдцем и душе́ю ве́рно сла́вим.
Песнь 4
Ирмо́с:
Дела́ смотре́ния Твоего́, Го́споди,/ ужаси́ша проро́ка Авваку́ма,/ изше́л бо еси́ на спасе́ние люде́й Твои́х,/ спасти́ пома́занныя Твоя́ прише́л еси́.
Землени́и бо есмы́ и пе́рстнии челове́цы,/ ве́рно припа́даем
и
пречестны́м моще́м твои́м, преподо́бная ма́ти Анно, прося́ще отпуще́ния грехо́в./ Моли́ся о ве́рно пря́зднующих твое́ честно́е обре́тение.
И́же крест взе́мши, блаже́нная,/ жела́емаго оте́чества, го́рняго Иерусали́ма, дости́же/ и в нем со А́нгелы лику́еши, Богому́драя А́нно./ Моли́ о чту́щих честны́х моще́й твои́х обре́тение.
Ны́не на Небесе́х
с
пра́ведными весели́шися, преподо́бная ма́ти А́нно./ С ни́ми же моли́ся, Христо́ви предстоя́щи,/ мир ми́рови дарова́ти и всем скорбя́щим утеше́ние.
Богоро́дичен: Кто не удиви́тся, или́ кто не почу́дится человеколю́бию Бо́жию?/ Сшед бо с Небесе́ и воплоти́ся нас ра́ди из Тебе́ без отца́, Еди́на Всепе́тая,/ Его́же моли́ изба́витися рабо́м Твои́м от вся́кия ско́рби.
Песнь 5
Ирмо́с:
Окая́нную ду́шу мою́, нощеборю́щуюся со тьмо́ю страсте́й,/ предвари́в, уще́дри/ и возсия́й мы́сленное со́лнце днесве́тлыя звезды́ во мне,/ во е́же раздели́ти нощь от све́та.
О любо́вию чту́щих твои́х честны́х моще́й обре́тение, Богому́драя А́нно,/ не преста́й моля́щися Христу́ Бо́гу,/ да прии́мем грехо́в просты́ню91
и да озари́т нас в нощи́ свет.
Мно́жество наро́да христоимени́тых люде́й, соше́дшеся днесь в твое́ обре́тение, преподо́бная А́нно,/ прикаса́ющеся ра́це моще́й твои́х, от них исцеле́ние почерпа́ем, непреста́нно Христу́ зову́ще:/ да озари́т нас в нощи́ свет.
Не то́кмо в житии́ твое́м, но и по сме́рти/ мно́гая чудеса́ от честны́я твоея́ ра́ки содева́ются приходя́щим с ве́рою, всеблаже́нная А́нно,/ неду́ги бо прогоня́еши и от бед избавля́еши си́лою Христо́вою,/ к Нему́ же непреста́нно зове́м:/ да озари́т нас в нощи́ свет.
Богоро́дичен: Враг вселука́вый по вся дни к го́ршим влече́т мя,/ и в ров поги́бели влага́ет, и во отча́яние мя влече́т./ Но того́ мя ловле́ния, Чи́стая, исхити́,/ и твори́ти во́лю Боже́ственную Сы́на Твоего́ и Бо́га на́шего наста́ви,/ и в час стра́шнаго прише́ствия Его́ изба́ви мя вся́каго осужде́ния.
Песнь 6
Ирмо́с:
Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.
Прииди́те, собери́теся, христоимени́тии наро́ди, све́тло пра́зднуим обре́тение честны́х моще́й Богому́дрыя А́нны./ Мо́литбося ко Влады́це и Бо́гу на́шему,/ да изба́вит нас от вся́каго озлобле́ния./ К Нему́ же, воспева́юще, глаго́лем:/ спасе́ нас десни́ца Твоя́, Го́споди.
Ра́ка моще́й твои́х, преподо́бная ма́ти А́нно, дража́йши сапфи́ра показа́ся,/ чудотвори́ва бо бе, исцеле́ния источа́ющи,/ ю́же облобыза́юще, ве́рнии, ра́достно от души́ Христу́ зове́м:/ спасе́ нас десни́ца Твоя́, Го́споди.
Све́тлыми сия́нии обрето́шася честны́я твоя́ мо́щи/ на версе́ земне́м, в ра́це ка́менне, преподо́бная ма́ти, княги́не А́нно./ От мног бо лет сокрове́ны бы́ша, ны́не же нам яви́шася я́ко заря́ пресве́тлая,/ просвеща́ют и освяща́ют чту́щих тя ве́рно и ра́достно от души́ Христу́ зову́щих:/ спасе́ нас десни́ца Твоя́, Го́споди.
Богоро́дичен: Тебе́, Чи́стую Де́ву, Нескве́рную,/ еди́ну и́мам сте́ну непреобори́му, и прибе́жище, и покро́в кре́пок, и ору́жие спасе́ния,/ да мя не пре́зриши, окая́ннаго,/ наде́ждо ненаде́жным, скорбя́щим ра́досте и заступле́ние.
Конда́к, глас 8.
Подо́бен: Взбра́нной:
Скоропослу́шную помо́щницу вси, су́щии в беда́х,/ благоче́стно воспое́м, А́нну святу́ю,/ днесь любо́вию соше́дшеся во обре́тение честны́х моще́й ея́./ Воспое́м песнь Еди́ному в Тро́ице Бо́гу, ра́дующеся,/ сподо́бльшему нас ви́дети пречи́стое сокро́вище честны́х моще́й ея́:/ от мног бо лет сокрове́ны бы́ша,/ напосле́док же нам явле́ны/ и источа́ют мно́га и разли́чна исцеле́ния./ Я́ко да моли́твами ея́ к Бо́гу/ от вся́ких находя́щих зол изба́вимся,/ ра́достною душе́ю и весе́лием се́рдца благода́рная воспое́м, глаго́люще:/ ра́дуйся, утвержде́ние гра́ду на́шему.
И́кос:
А́нгельским на земли́ житие́м показа́ся, А́нгелы удиви́ла еси́/ и челове́ки просвети́ла еси́ заря́ми чуде́с твои́х,/ преподо́бная ма́ти, благове́рная вели́кая княги́не А́нно./ И ны́не нас вразуми́ воспева́ти ти песнь к твоему́ хвале́нию ра́достным гла́сом, си́це глаго́лющих:/ ра́дуйся, я́ко оста́вила еси́ тле́нное мудрова́ние и восприя́ла еси́ нетле́нный вене́ц;/ ра́дуйся, терпели́вая душе́ю, я́же злоко́зненнаго врага́ под нога́ма сте́рла еси́./ Ра́дуйся, я́ко ни́жнее мудрова́ние оста́вила еси́ и Вы́шняго ца́рствия дости́гла еси́;/ ра́дуйся, я́ко па́че естества́ челове́ча честна́я ра́ка моще́й твои́х/ из землены́х недр изда́вшися и ста на версе́ земне́м./ Ра́дуйся, цели́тельнице боле́знем и отгони́тельнице страсте́м;/ ра́дуйся, Богому́драя А́нно, утвержде́ние гра́ду на́шему.
Песнь 7
Ирмо́с:
Огня́ гаси́лище –
отроко́в моли́твы,/ ороша́ющая пещь, пропове́дница чудесе́,/ не опаля
́
ющи, ниже́ сожига́ющи/ песносло́вцы Бо́га оте́ц на́ших.
Уста́ви ны́нешнюю бу́рю, обдержа́щую нас, преподо́бная,/ и укроти́ моли́твами твои́ми, и ва́рварское нахожде́ние низложи́,/ и нас, раб твои́х, на супоста́ты укрепи́,/ да, ра́дутощеся, пои́м Бо́га оте́ц на́ших.
Фарисе́йски не лицеме́руем,/ но, со смире́нием и ра́достию прикаса́ющеся честне́й ра́це твое́й, Богому́драя А́нно,/ про́сим проще́ния грехо́в,/ песносло́вяще Бо́га оте́ц на́ших.
Храни́тельница бу́ди гра́ду твоему́ и всем христоимени́тым лю́дем, преподо́бная ма́ти А́нно./ Сохраня́й от пога́ных наше́ствия и междоусо́бныя бра́ни, гла́да же и па́губы,/ да моли́твами твои́ми изба́вльшеся, Христу́ зове́м,/ песносло́вяще Бо́га оте́ц на́ших.
Богоро́дичен: Отча́явшимся ве́лие прибе́жище, обурева́емым ти́хое приста́нище еси́, Богоро́дице./ Те́мже и мы, припа́дающии, да не постыди́мся, Ма́ти И́стиннаго Живота́, Тебе́ благодаря́ще и пою́ще:/ благослове́нна Ты в жена́х еси́, Пренепоро́чная Влады́чице.
Песнь 8
Ирмо́с:
Ороси́вшаго пещь и о́троки Сохра́ншаго посреде́ горя́щаго пла́мене,/ о́троцы, славосло́вите,/ свяще́нницы, благослови́те,/ лю́дие, превозноси́те во вся ве́ки.
Царю́ Христу́ в Небе́снем черто́зе предстои́ши с му́дрыми де́вами,/ помина́й нас, чту́щих честны́х моще́й твои́х обре́тение,/ и избавля́й нас от вся́кия ну́жды и печа́ли,/ да, ра́дующеся, Христу́ зове́м:/ лю́дие, превозноси́те Его́ во вся ве́ки.
Чудесе́м исто́чник ра́ка твоя́ яви́ся, преподо́бная ма́ти А́нно,/ от нея́же оби́льно вси притека́ющии прие́млют телесе́м здра́вие и душа́м спасе́ние твои́ми моли́твами,/ те́мже, ра́дующеся, Христу́ зове́м:/ лю́дие, превозноси́те Его́ во вся ве́ки.
Ше́ствие твое́ до́бре сконча́ла еси́ и мирски́й мяте́ж, а́ки безбу́рное приста́нище, преплы́ла еси́,/ плоть твою́ ду́хови повину́ла еси́./ И ны́не на Небесе́х предстои́ши всех Царю́ Христу́, Ему́же зове́м:/ лю́дие, превозноси́те Его́ во вся ве́ки.
Богоро́дичен: Ще́драго и человеколюби́ваго Спа́са поро́ждши, Чи́стая,/ Того́ моли́ уще́дрити раба́ Твоего́ и к покая́ния пути́ наста́вити,/ лука́ваго собла́зны от се́рдда моего́ отжени́ и того́ ловле́ния,/ я́ко да непреста́нно пою́ Тя, Чи́стую, во вся ве́ки.
Песнь 9
Ирмо́с:
Иса́ие, лику́ий,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.
Исто́чник, исцеле́ния испуща́я,/ врачева́ние же безме́здно и ковче́г свяще́ния твои́х моще́й ра́ка яви́ся,/ из нея́же почерпа́ем здра́вие присноживо́тное, притека́ющии ве́рно, преподо́бная А́нно,/ и и́же тебе́ Дарова́вшаго в пе́снех велича́ем.
Возвели́чила еси́ на земли́ твоего́ Влады́ку,/ тем и во обре́тении честны́х моще́й твои́х глубину́ чуде́с показа́ла еси́/ и струю́ неоскудева́емую ра́ку моще́й твои́х, преподо́бная А́нно./ Слепы́м е́же ви́дети дарова́ся, прокаже́нным очище́ние,/ и одержи́мыя нечи́стыми ду́хи целому́дрены твори́ши./ Те́мже тя велича́ем.
Недосто́йною мое́ю руко́ю принесо́х ти таково́е сло́во изви́тия, Богому́драя А́нно,/ не пре́зри, но приими́ сие́ с любо́вию/ и моли́ за мя Творца́ твоего́, Влады́ку и Го́спода, та́мошняго мя изба́вити муче́ния/ и ми́лость обрести́ ми в день стра́шнаго испыта́ния.
Богоро́дичен: Влады́чице ми́ра, Богоро́дице,/ и́же во глубине́ зол поги́бели мене́ погруже́ннаго злоу́мными сластьми́ плотски́ми и пристра́стием веще́м жития́,/ изведи́, Пречи́стая Де́во, Свои́м милосе́рдием,/ и́о не и́мам наде́жды, весь бо есмь, Чи́стая, во отча́янии,/ да Тя непреста́нно велича́ю.
Свети́лен.
Подо́бен: Жены́, услы́шите:
Я́коже со́лнце облиста́ющи, чудеса́ испуща́еши, просвеща́ющи ве́рных сердца́,/ и́же твое́ сла́вное обре́тение ве́рно творя́щия спаса́й, преподо́бная ма́ти А́нно.
Сла́ва, и ны́не, Богоро́дичен:
Тя Предста́тельницу и́мамы, гре́шнии, о Пресвята́я Де́во./ Ты благопреме́нна сотвори́ Сы́на Твоего́ и Бо́га на́шего/ ма́терними Твои́ми моли́твами.
Моли́тва
О преподо́бная и преблаже́нная ма́ти А́нно! Смире́нно припа́дающе к честны́м моще́м твои́м, мо́лимся со слеза́ми приле́жно: не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу. О преблаже́нная вели́кая княги́не А́нно! Не забу́ди присеща́ти чад твои́х, а́ще бо те́лом и преста́вилася еси́ от нас, но и по сме́рти жи́ва пребыва́еши и не отступа́еши от нас ду́хом, сохраня́ющи нас от стрел вра́жиих, вся́кия пре́лести бесо́вския и ко́зней диа́вольских. Моли́твеннице на́ша усе́рдная! Не преста́й моля́щися за ны ко Христу́, Бо́гу на́шему, а́ще бо моще́й твои́х ра́ка пред очи́ма на́шима вы́ну ви́дима есть, но свята́я душа́ твоя́, со А́нгельскими во́инствы у Престо́ла Вседержи́теля предстоя́щи, досто́йно весели́тся. К тебе́ у́бо припа́даем, тебе́ мо́лимся, тебе́ ми́ли ся де́ем: моли́ся, преблаже́нная А́нно, Всеми́лостивому Бо́гу на́шему о спасе́нии душ на́ших, е́же испроси́ти нам вре́мя на покая́ние и невозбра́нно прейти́ от земли́ на Не́бо, мыта́рств го́рьких и ве́чныя му́ки изба́витися и Небе́сному Ца́рствию насле́дником бы́ти со все́ми преподо́бными, от ве́ка угоди́вшими Го́споду на́шему Иису́су Христу́, Ему́же сла́ва, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.
Святая благоверная княгиня Анна Кашинская мирно преставилась 2 октября 1368 года и была погребена в Успенском соборе в городе Кашине. Собор был храмом женского монастыря, в котором подвизалась благоверная княгиня Анна в последние годы земной жизни; впоследствии он стал приходским храмом. С годами Успенский храм обветшал, сквозь зияющий пол открылась гробница святой княгини Анны, память о которой со временем изгладилась в народе. Не зная, чья гробница находится в храме, прихожане ставили на гробницу вещи, клали одежду. В 1611 году, в смутное время, благоверная княгиня Анна явилась тяжело больному пономарю Успенского храма Герасиму, исцелила его от болезни и велела передать соборному протопопу Василию и жителям города Кашина, что Господь по ее молитвам сохранит город от литовцев, разорявших в то время Северо-Западную Русь. Благоверная Анна повелела чтить ее память и возжечь лампаду пред иконой Спаса Нерукотворенного, которая находилась над местом ее упокоения. С той поры кашинцы стали благоговейно хранить и почитать гробницу святой княгини Анны. При гробе ее неоднократно совершались исцеления больных.
В царствование Алексея Михайловича (1645–1676) и при Патриархе Московском и всея Руси Иосифе (1642–1652) жители Кашина ходатайствовали об открытии нетленных мощей покровительницы своего города. Святейший Патриарх Иосиф благословил архиепископа Тверского Иону свидетельствовать мощи благоверной княгини Анны, что и было исполнено 21 июля 1649 года. Святые мощи благоверной княгини Анны были обретены нетленными. В том же году Собор Русской Православной Церкви причислил благоверную княгиню Анну к лику святых. На обретение мощей была составлена служба.
Память преподобной Анны Кашинской совершается также 12 июня.
Литература:
1. Архангелов С., священник. Святая благоверная княгиня-инокиня Анна Кашинская. СПб., 1909.
2. Архангелов С., священник. Житие и чудеса святой благоверной великой княгини Анны Кашинской. СПб., 1909.
3. Житие и подвиги благоверной великой княгини Анны Кашинской. М., 1909.
4. А. П. Житие и прославление святой преподобной княгини Анны Кашинской. М., 1912.
5. Иоаким, иеромонах. Житие святой благоверной княгини Анны Кашинской. М., 1909.